Архива - 2012 - Видео

Здраво Млади 2012
Stuttgart Online се оформени во 2006 година. Доаѓаат од Белград, Србија. Веб магазинот Popboks ги прогласуваат за дебитанти на годината во 2007. Во 2009 го издаваат својот деби албум „Radost svakom domaćinstvu“ за издавачката куќа Одличан хрчак. Следуваат настапи и турнеи во секој агол на бившата ни држава каде што бендот создава квалитетна и бројна фан база.
„Права ствар“ е името на новиот албум кој е снимен во текот на 2011 а издаден годинава. Албумот содржи 11 песни и претставува (според зборовите на авторите) полнокрвна рок плоча со голем број на идни хитови. На Здраво Млади доаѓаат да го промовираат новиот албум, а кој ги гледал знае дека се работи за ултра енергично дуо кое испорачува енергија на која и ЕЛЕМ може да и позавиди, а секој концерт го свири како да му е прв.
Stuttgart Online се Бојан Слачала и Марко Баришиќ.

Здраво Млади 2012

Здраво Млади 2012 
Тие се викаат Electricity in our homes и доаѓаат од Лондон, Англија. Прагматични во своите видици и во својот звук и концизни во своите настапи, тие честопати се движат на границата на поп хаосот. Electricity In Our Homes е бенд кој знае да „игра“ со жанровите на начин кој воодушевува. На трагите на Talking Heads, Sonic Youth, Captain Beefheart и Can звукот бендот создава минималистички волшебна гротеска ослободена од комерцијалниот вирус. Electricity in our homes емитуваат еклектична енергија и сурфаат на бизарен, поп ориентиран ритам. Guardian ќе ги нарече арт-фанк, пред се поради нивната агресивно-нежна спонтаност во создавањето музика. Имаат издадено 5 EP изданија и еден албум наречен Dear Shareholder. Бендот не може да го најде вистинскиот издавач, па до сега имаат издавано за Modern Pop, Too Pure, Waks, PLR, Sweatshop па дури и едно издание за 4AD. Едно е сигурно - Electricity in our homes се поп со поинаква перцепција. Во Скопје настапуваат за првпат. 

Здраво Млади 2012
Во текот на безмалку 30 години постоење, новосадската група Обојени Програм стекна култен статус на балканските простори. Тие се првиот бенд кој се појави на познатата емисија “120 minutes” на тогаш реномираниoт MTV во 1993 година, и еден од ретките бендови кој имаше чест да биде представен од страна на познатиот John Peel во неговата радио емисија во 2002 година. Изминатите години низ бендот се менуваа десетици различни членови, а единствен член од оригиналната постава е Кебра – главниот вокал и автор на понекогаш емотивно обоени, понекогаш политички ангажирани текстови. Неговиот глас и типичниот начин на пеење станаа во голема мерка заштитен знак на овој бенд. За Exit labelot штотуку го издадоа својот нов албум наречен „Како то мислиш: ми“. Албумот можете да го соберете бесплатно на сајтот на фестивалот Exit.