Кому да му се верува кога станува збор за климата?

Една од најголемите бламажи кои Меѓувладиниот совет за промена на климата (IPCC) сам си ја приреди е тврдењето дека глечерите на Хималаите најверојатно ќе се стопат до 2035 година. Во процената се згреши за 300 години. Скандалот изби во декември која хакерите ги открија приватните емаил пораки на еден од научниците во Советот, а подоцна ги објавија на интернет.

По самитот за климата, кој е одржан во Копенхаген, обвинувањата на сметка на Советот станаа уште побројни. Претседателот на Советот Рахендра Пачаури се извини заради погрешните наоди за годината во која ќе се стопат глечерите на Хималаите: „Важното сознание од Четвртиот светски извештај за климата е истакнувањето дека постојат големи ризици како за индустриските така и за сиромашните земји“.

Не го слушаат спротивставеното мислење

Палава Багла, новинар кој пишува за списанието „Science“ вели дека Пачаури и пред самитот во Копенхаген бил информиран дека 2035 година е погрешна година и дека станува збор за грешка од 300 години. Грешката потекнува од еден извештај кој се темелеше на необјавено истражување, а стануваше збор за инверзија на броевите во наведената година – 2035 наместо 2350. „Оваа грешка можеше да се избегне доколку се следеа нормите за објавување научни текстови, а кои вклучуваат проверувања што ги извршуваат колеги од струката“, тврди списанието Science.

Холанѓанецот Ричард Тол истакнува дека еден од проблемите е изборот на научниците кои работеа на извештајот: „Советот на ОН за климата се приклони кон зелените и со годините станува сè позелен. Научниците како мене кои застапуваат поинакво мислење не се повикани. Ние поинаку ја толкуваме истата литература и тврдам дека проблемот лежи во политиката за климата. Ако дејствуваме пребрзо и правиме премногу, тогаш тоа ќе биде навистина скапо.“

Барањата за реформа на Советот на ОН за климата се сè погласни. Критичарите на работата на Советот сметаат дека овие најнови грешки во значителна мерка ќе и’ наштетат на довербата на Советот. Претседателот на Советот Пачаури е против тоа затоа што, како што вели, Советот во 2007 година ја доби Нобеловата награда за мир и во последните 21 година извршува одлична работа:„ Доколку денес би морале да основаме организација која би требала да ги процени последниците на климатските промени и која би требало да ги задоволи потребите на човештвото, а особено на оние кои носат одлуки, тогаш би морале да формираме организација која е слична на овој Совет“.

Заговорниците на Советот наведуваат дека климатските прогнози и модели на работа се многу сложени. А борците за заштита на природата наведуваат дека островите на Тихиот океан исчезнуваат, дека многу области се погодени од суша и дека глечерите брзо се топат. Тие велат дека тоа не се гледа само од сателитските снимки, туку и со голо око.

Извор: dw-world.de