ЈугоИсток 24-7 Фото маратон

Ве покануваме на презентацијата на фотографиите направени во рамки на проектот ЈугоИсток 24-7 Фото маратон. Презентацијата ќе се одржи на 13 март во Културниот центар Точка, со почеток во 20 часот.

Истовремено посетителите ќе можат да ги добијат разгледниците на кои се испечатени најдобрите фотографии за секој поим на локално и на меѓунродно ниво.

На презентацијата ќе бидат објавени победниците како на локалниот, така и на меѓународниот натпревар.

ЈугоИсток 24-7 Фото маратон претставува десет фотографии направени во седум града во текот на 24 часа. Основната идеја на проектот беше да се одговори на неколку прашања. Што го прави градот во кој живеам мој град? Што е типично во него за земјата и за регионот во кои живеам? Дали е урбан или рурален, повеќе е брз или бавен, зелен или сив?

Од 11 часот на 13 февруари до 11 часот на 14 февруари стотици фотографи од седум југоисточни европски градови истовремено правеа фотографии поврзани со 10 исти термини: Куќа од соништата, Внимание!, Утопија, “Град, земја, река”, Темпо, Oтворено, Ред, Поврзување, „Германски?“, Произведено во Македонија. На денот одреден за правење на фотографиите 42 учесници се приклучија во проектот. Најдобрите 10 фотографии ги избра локалното жири во состав: Роберт Јанкуловски, Иван Блажев, Дарко Петровски, Вибке Штадлер и Владимир Јанковски.

Трите најдобри фотографии од секој поим од седумте градови (Бања Лука, Осиек, Печ, Приштина, Русе, Херманштад и Скопје) продолжија да се натпреваруваат на меѓународниот натпревар. Најдобрите 10 фотографии од сите 7 градови беа избрани од германските фотографи Јан Брандес и Мазијар Моради. На почетокот на април 2010 година овие фотографии ќе бидат претставени на завршна изложба во унгарскиот град Печ, којa се одвива во рамките на манифестацијата Печ, град на културата 2010.

Авторите на најдобрите фотографии ќе бидат поканети на отворањето на изложбата. Десетте најдобри фотографии од седумте градови се испечатени.

ЈугоИсток 24-7 е партнерски проект на неколку менаџери во културата на фондацијата Роберт Бош кои работат во југоисточна Европа. Проектот е поддржан фондацијата Роберт Бош и Гете Институтот. Авионските летови се поддржани од компанијата Малев.

Информација за проектот

ЈугоИсток 24-7 ги поврзува активното соочување со сопствениот град и потребата од нов фотографски поглед.

Веќе неколку години во многу земји од светот е актуелно урбаниот простор да се анализира од општествена гледна точка. Се поставуваат прашања од типот што е она што еден град го прави град и која е улогата на неговите жители. Секое место има свои особености и симболи. Но, за жителите тие се често се различни од оние официјалните. Што го прави градот во кој живеам мој град? Што е типично во него за земјата и регионот во кои живеам? Дали е урбан или рурален, брз или бавен, зелен или сив?

Во фотографиите би требало да се огледаат сличностите и разликите во начинот на живот и во восприемањето на учесниците од седумте југоисточни европски градови. ЈугоИсток 24-7 покажува како луѓето во различните земји на различни начини асоцијативно согледуваат одредени поими и ги поврзуваат со нивните родни градови.

Настрана од типичните туристички маршрути и претстави за еден град ќе биде овозможен уметничко-документаристички пристап, кој ги избегнува отсликувањата на националните симболи и низ игра отвора нов поглед на сопствениот град.