ЕДНА ГОДИНА „ОКНО“

Го формиравме „Окно“ оти сметавме дека медиумските можности на интернетот се идеална прилика за демократизација и еманципација на македонскиот брутализиран медиумски простор.

Новите медиуми се можност да се поработи на долгорочното создавање публика која ќе има повисоки информативни, културни и демократски стандарди од сегашната публика мошне подложна на популистички медиумски манипулации.

Го формиравме „Окно“ и за да се бориме за пошироките европски вредности во нашата земја. Нашата намера е и низ „Окно“ да помогнеме да се создаде и консолидира една активна европска граѓанскост, којашто, како што вели Етјен Балибар, е ослободена од мистиката на идентитетот, од секоја илузија за нужноста на историското течение и од секое верување во непогрешивоста на власта. Осмислувајќи го нашиот проект, се раководевме, значи, со трите активни принципи на Балибар со кои се устројува граѓанскоста, односно демократската политика: тоа се еманципацијата, или колективното освојување на основните индивидуални права; општествената преобразба на структурите на доминацијата и односите на моќта; и најпосле, цивилноста, или произведувањето услови и претпоставки, „теренски“ и „теориски“, за едно поинакво политичко дејствување воошто да биде можно.

Поинаку речено, „Окно“ се обидува да биде одговор на две многу силно маркирани општествени слабости во Македонија: медиумската тривијализација (која ја брутализира целокупната култура) и општествената фрагментизација (особено меѓу младите; иако сите постојано апатично констатираме дека општеството ни е разбиено, секој трга на своја страна итн., ретко кој презема нешто за да се прекине понатамошното атомизирање на општеството).

„Окно“, значи, во прв ред сака да биде создавач на стварно покомплексни и поквалитетни медиумски содржини (за коишто интересот можеби е мал, но од негде мора да се почне!); од друга страна, сакаме да бидеме и средиште и собиралиште на една нова креативна генерација која реално ќе успее да ја приклучи Македонија кон новите регионални и европски културни вмрежувања.

Порталот за кратко време стана полигон кајшто се промовираат прогресивните помлади автори во нашата земја: Ирена Цветковиќ, Ана Ангелова, Анастас Вангели, Сеад Џигал, Владимир Јанковски, Бојан Антиќ, Дарјан Раденковиќ, Драган Денковски, Ѓорѓи Крстевски, Вангел Башевски... На „Окно“ претставивме и десетици македонски уметници: фотографи, писатели, ликовни автори, дизајнери, филмаџии... Се разбира, претставивме и неколку десетици странски уметници, писатели, теоретичари, новинари... - оти тоа е една од главните цели на нашиот портал: да го прикопчуваме нашиот контекст кон регионалните, европски и светски теориски и уметнички тенденции.

Изминатава година покажа дека нашата мисија има смисла и дека дури и во „темниот вилает“, Република Македонија, можно е јавно да се работи на еманципациските политики - и притоа да се биде слушнат. Од својот почеток во март 2009 година „Окно“ постојано има раст на публиката: првите два-три месеци имавме околу 400-500 посетители дневно, а последниве месеци имаме и над 1500 посетители дневно. Публика имаме поради разновидноста и квалитетот на содржините; за овие 12 месеци објавени се околу 2.000 прилози, т.е. по околу 6 нови прилози дневно.

Мошне ни е важна и отвореноста на „Окно“ кон разни граѓански иницијативи; снажно стоевме, на пример, зад протестите на студентите против изградба на верски објекти на главниот скопски плоштад (организиравме и успешен конкурс за разгледници со мотив „плоштад Македонија“); континуирано ги поддржуваме и пишуваме за правата на дискриминираните граѓани (го поддржавме Маршот на толеранцијата), борејќи се за афирмација и унапредување на човечките права. На ова поле, отвореност кон НВО секторот и граѓанските иницијативи, „Окно“ допрва може да се развива и да ја продлабочува стратешката испреплетеност со невладините проекти.

Се разбира, „Окно“ има и видливи и не толку видливи слабости. Едно од оправдувањата за слабостите е дека првата година ја истеравме со навистина мал буџет од 10.000 евра (главно дадени од ФИООМ). Тие пари се доволни да се изнајми стан и да се платат режиските трошоци за една година. Јасно е дека со толку пари „Окно“ не може да преживее, или барем не во формата во која е замислено.

ФИООМ и за оваа година ни одобри грант за финансирање на „Окно“ и тоа е добрата вест, и за вас, читателите, и за нас, кои ги работиме порталот.
Вам, почитувани читатели, ви благодариме за посетите, советите, прилозите и коментарите. Вашата улога, се разбира, е непроценлива.

Првата година редакцијата на „Окно“ ја сочинуваа Никола Гелевски, Владимир Јанковски и Ѓорѓи Крстевски. Голема помош ни дадоа и Дамјан Јаневски (кој технички ја направи страницата) и графичкото студио „Кома“ (пред се’, Небојша Гелевски). Во културниот центар „Точка“ ни беше сместена редакцијата, и затоа сме му благодарни и на здружението „Контрапункт“ (кое го води Искра Гешоска) за отстапениот простор.

линк до првиот текст на „Окно“:
http://www.okno.mk/node/144