Окно има нов музички уредник

Добредојдовте во (полу)тајните зони на Окно, во пештерата на Грга! Или да кажам: во речните (подземни, разбира се, оти некако таква е музиката) вирови на Грга?! Кај и да е, овде нема многу текст и многу бамборење; ради тоа кратко:

Сега за сега, почитувани читатели, гледачи и слушатели, ќе ве опслужувам само со видео и звук, а многу наскоро ќе се потрудам да склопувам и по некоја неизбежна, неопходна буква, збор, реченица во облик на најава за концерт, критика за некој албум, бенд...

Ќе среќавате сè („старо купуем, ново не одбивам“, стари акумулатори, грамофони, точаци, тостери, сувенири, плочи, телевизори, радиоактивно железо, украдени шини од пруга, расклопени мостови, шверцан генетски материјал, хибридни сорти семиња, а богами и киборзи, човечици, хомункулуси, ретки птици, инсекти и други загрозени животински и човечки видови итн.).

Ќе се трудам да ве држам во ритам со нови изданија, да ве потсетувам на стари добри нумери и, секако, на крај ама не најмалку важно, ќе ја следам домашната и регионалната сцена.

Жанрови не постојат – тоа е измислица на индустријата:)

Да не одземам претерано од музичкото време (на досадното читање:), кликајте плеј и отфурајте во нетекстуалните зони на Окно, кајшто пребиваат (не тепаат, нит по уши, нит друкчие, ментално:) етеричните штурци и славеи, како и нимфите, сирените, музикалните џуџиња и другите невидливи речни музиканти.

Грга