Боли глава

Европа, Светот прави стратегија како да го скрши ВМРО ДПМНЕ и оние 44 пратеници да изгласаат предавнички уставни измени. Немојте да мислите дека Ковачевски, Ахмети или Османи се тие, и немојте да мислите дека е лесно. Не е лесно. Силна борба се води за да се одбрани честа на македонскиот народ, кои овие корумпирани, ситни владини функционерчиња го продадоа македонскиот народ. Ќе се бориме, не знам дали ќе успееме, можеби нас ќе нè нема, но ќе се бориме, и ќе издржиме и јас ветувам, уставни измени под бугарски диктат нема да има, тоа го имате од мене како ветување.

Христијан Мицкоски, претседателот на ВМРО-ДПМНЕ, пред партиското членство во Кичево, 22.08.23.

Некој дисперзиран жолтоклунец Попов од ВМРО ДПМНЕ вели, недоволно се вложувало во образованието. Оти во вмровско груево си знаевме дека сѐ ни е доволно само да не се расипува уште.

Заборавивте дека ВМРО ДПМНЕ направи закон со дебилно екстерно за студенти со жигосување? Зошто ви излегоа сите студенти и ве паднаа?

Заборавивте дека имаше екстерно за основци на раскантани компјутери „за секое дете” со незаконски кец во свидетелство и казни за неподобни наставници по вмровски критериуми?

Та вмро нема комисија за образование, има компанијамесоборанија кружок за како ќе каже боксерот или билдерот.

Наместо да се скрие вмро под ќебе на тема образование (да не зборувал и за наука, дисперзираниов), тие се прават на тошо!?

Емилија Целакоска, Фејсбук, 18.08.23.

Мнозинството медиуми не согледаа дека највидливата медиумска гласноговорничка на т.н. „Коалиција за заштита на децата“ е дел од раководството (и донаторка) на проруската партија „Родина Македонија“ – еден од најексплицитните извори на руска пропаганда со дезинформации во Македонија.

Партијата „Родина Македонија“ (која произлегува од здружението МИР – кратенка од „Македонија и Русија“), на 20 јануари 2022 организираше протест пред украинската амбасада против „глорификацијата на нацизмот во Украина”, а по воената агресија на Русија врз Украина, му даде отворена поддршка на Путин за „дефашизација“ на Украина пред руската амбасада.

Во овој период, највидливата медиумска гласноговорничка на т.н. „Коалиција за заштита на децата“, Гордана Гоџо, беше споделувач на проруски дезинформации на Фејсбук на многу теми, дел од нив означени од оваа социјална мрежа како „лажни информации“.

И претходно, за време на ковид пандемијата, Гоџо ширеше заплашувачки дезинформации за вакцините, а проруската „Родина Македонија“ ѝ овозможи видеоплатформа за дополнително ширење дезинформации и теории на завера за пандемијата и вакцинацијата.

Славчо Димитров, Фејсбук,10.08.23.

Јас можам да замислам како членовите на Rainbow Family им изгледаат на локалното население. Можам да го замислам и инстинктивниот страв од нешто поинакво во традиционалната заедница, нешто што може да остави трајни последици врз нивните навики и нивното сфаќање на „нормалноста“.

Но, се надевам дека „показната вежба“ со чистењето на отпадот и демонстрирање на можноста на живеење слободен живот можеби ќе фатат некој пелцер и во нашето природно и општествено опкружување.

Значи, да ја поправиме констатацијата од цитираниот наслов на почетокот на текстот. Не, не го запоседнаа Мавровско Езеро странски хипици, панкери, јогисти (што и да значи тоа), туку го ослободија. Засега само од сметот.

Ѕвездан Георгиевски, Призма, 07.08.23.

За 120 роденден на современа Македонија посакувам вадењето македонски пасош, тој врвен израз нашата взаемна поврзаност, обврзаност и лојалност со македонската држава, да стане процес кој е соодветен на нивото на таквата врска. Посакувам тоа да личи на современа европска држава, па уште и кандидатка за членка во ЕУ, а не на налик на најретроградна полициска држава која ужива да го понижува, репресира, гази и измолзува својот суверен.

Aпликацијата за закажување документи ги исполнува сите фамозни клишеа и вицови за полицијата оти е најглупавата и најбрука од апликација која е смислена, просто да не ти се верува дека тоа е официјална државна апликација.

Просториите и кабините кај МТВ се комбинација на хорор, грозотија и грдотија. (...) Ѕидовите нечисти, неискречени којзнае од кога, стаклата исто, подовите, пултовите, ма сè, да ти се поврати. На еден гипс-ѕид од кабина дури има и дупка, како од тупаница, како на некој кутар сограѓанин да му „пукнало”, како во една од приказните во аргентинско-шпанскиот филм „Бесни приказни” (Relatos Salvajes).

Каролина Ристова Астеруд, Фејсбук, 02.08.23.

о боже, се ближи уште една округла годишнина од скопскиот земјотрес, кој ли ќе го слуша трескањето од земја на разни политичар(к)и со усти полни пиетет за „градот на солидарноста“, додека 30 години систематски, бесрамно и брутално криминално го ограбуваат, пустошат и го прават бетонско чудовиште, грдосија поружна од најружен кошмар. амин.

Марина Костова, Фејсбук, 20.07.23.