Анџелина Џоли пред неколку дена најави дека ќе се залага за укинување на Република Српска. Но, тука нема да зборуваме за Република Српска.

Бидејќи, сосема е неспорно дека легитимитетот на Република Српска е сомнителен. Тој политички ентитет е создаден во вооружен судир во кој татковците-создавачи на Српска не се срамеа од фактот што имаше масовни злосторства.

Тоа беа планирани злосторства, систематски изведени. Легитимитетот на Република Српска конечно го подјадува тоа што тие злосторства не се признати, а злосторниците не се изведени на суд во таа политичка заедница. Да се убедуваме денес околу тоа значи дека немаме попаметна работа. Па, добро, кога веќе немаме попаметна работа, ајде малку да се забавуваме.

Тогаш, да прашаме, која е Анџелина Џоли? Експерт за меѓународно право? Личност со искуство во политички дебати околу признавање или непризнавање на политички заедници? Долгогодишна висока функционерка на Обединетите Нации, задолжена за постконфликтни региони? Висок службеник во американската служба за надворешна политика?

Ништо од наведеното. Анџелина Џоли е актерка. Попрецизно – естрадна ѕвезда. Со други зборови, таа нема никаква компетенција да учествува во јавни разговори за постоење или укинување на постоењето на политички ентитети.

Па, сепак, таа ѝ се обрати на јавноста и тоа нејзино обраќање, барем тука, се сфаќа сериозно. Што всушност се случи? Дали станува збор само за обострана глупост: за површноста на една актерка и незнаењето на новинарите? Всушност не, станува збор за делумно правилно функционирање на јавната сфера. Мора јавно да се разговара за важните политички прашања. Тоа е смислата на постоењето на јавната сфера. Во таа насока, Анџелина Џоли го искажа својот став во однос на едно важно прашање, и тој став медиумите со право го пренесоа. Каде е грешката? Вториот услов за функционирање на јавната сфера е учесниците да бидат компетентни за прашањата по кои се произнесуваат.

Низ комерцијализираните медиуми, значи јавната сфера, компетентноста ѝ го препушти местото на славата. Легитимните учесници во јавните расправи денес не се веќе компетентни личности, туку славни. Славните личности денес го подигнуваат тиражот, луѓето повеќе ги интересира што ќе каже славната личност отколку што ќе каже компетентната личност. Од друга страна, пак, јавната сфера мора да ја задоволи суштинската причина за своето постоење, а тука не станува збор за стекнување пари, туку баш за заедничкото разгледување на важните прашања. Случајот на Анџелина Џоли е само еден во низата примери за поразителниот ефект на пазарната логика во јавната сфера.

Сигурен сум дека одреден број луѓе, внимателно слушаат што Новак Ѓоковиќ и неговиот татко имаат да кажат за косовското прашање. Можеме дури и да замислиме некој да ги повика да ги штитат српските интереси, во некои можни преговори за решавање на тоа прашање. Но, никој од нас не може да замисли да му се јави на Ѓоковиќ за, на пример, овој да му го оперира слепото црево со рекет. Забавно е да се размислува во која точка јавната сфера го исклучува здравиот разум.

Извор: Peščanik.net

Илустрација: Лангдон Гревјс